November 27, 2022
சமையல்

அட்டகாசமான சுவையில் முட்டைக்கோஸ் வடை செய்வது எப்படி…?

மாலை வேளையில் காபி, டீ குடிக்கும் போது வடை சாப்பிட வேண்டுமென்ற ஆசை எழுகிறதா ? உளுந்து வடை சாப்பிட்டு அலுத்து விட்டதா ? அப்படியானால் இன்று அந்த உளுந்து வடையில் சற்று வித்தியாசமாக முட்டைக்கோஸ் சேர்த்து முட்டைக்கோஸ் உளுந்து வடை செய்யுங்கள். இந்த முட்டைக்கோஸ் உளுந்து வடை அட்டகாசமான சுவையில் குழந்தைகள் முதல் பெரியவர்கள் வரை விரும்பி சாப்பிடும் வகையில் அற்புதமாக இருக்கும்.

தேவையான பொருட்கள்:
உளுத்தம் பருப்பு – 1/2 கப்
நறுக்கிய முட்டைக்கோஸ் – 1 கப்
கறிவேப்பிலை – சிறிது
பச்சை மிளகாய் – 2(பொடியாக நறுக்கியது)
கொத்தமல்லி – சிறிது
இஞ்சி – 1/2 இன்ச் துண்டு
பெருங்காயத் தூள் – 1/4 டீஸ்பூன்
உப்பு மற்றும் நீர் – தேவையான அளவு
எண்ணெய் – பொரிப்பதற்கு தேவையான அளவு

செய்முறை:
முதலில் உளுத்தம் பருப்பை நீரில் குறைந்தது 3/4 மணிநேரம் ஊற வைத்து நன்கு கழுவிக் கொள்ள வேண்டும்.

பின் அதை மிக்சர் ஜாரில் போட்டு சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.(அதிக நீரை சேர்த்துவிட வேண்டாம்)

மாவு நல்ல பதத்தில் உள்ளதா என்பதை கண்டறிய நீரில் அரைத்த மாவை சிறிது போடும் போது, அது மிதந்தவாறு இருந்தால், சரியான பதத்தில் உள்ளது என்று அர்த்தம்.

பின்னர் அரைத்த மாவை ஒரு பாத்திரத்தில் எடுத்து, அதில் நறுக்கிய முட்டைக்கோஸ், பச்சை மிளகாய், கறிவேப்பிலை, கொத்தமல்லி, துருவிய இஞ்சி மற்றும் சிறிது உப்பு சேர்த்து நன்கு கலந்து கொள்ள வேண்டும்.

பிறகு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், சிறிது மாவை எடுத்து, அதன் நடுவே துளையிட்டு எண்ணெயில் போட்டு பொன்னிறமாக பொரித்து எடுக்க வேண்டும். இதேப் போல் அனைத்து மாவையும் போட்டு எடுத்தால், சுவையான முட்டைக்கோஸ் வடை தயார்.

Related posts

Leave a Comment