January 31, 2023
டிப்ஸ்

வயதானவர்களை எப்படி கீழே விழாமல் பாதுகாப்பது

அனைவருடைய வீட்டிலும் அநேகமாக ஒரு முதியவராவது இருக்க அதிக வாய்ப்புள்ளது. இந்த முதியவர்களை நம் பத்திரமாக பாது காக்க வேண்டியது நம் கடமையாகும். அவர்கள் நடப்பது முதல் படுப்பது வரை யாரையும் சார்ந்திராவிட்டாலும் அவர்கள் மீது ஒரு கண் வைத்திருக்க வேண்டும்.

ஏனெனில் திடகாத்திரமாக இருப்பவர்கள் கூட சில சமயங்களில் அவர்களே எதிர்பாராமல் தடுமாறி விழுந்துவிடுவதுண்டு. ஏன் இப்படி விழுகிறார்கள். குழந்தை பருவத்தில் நடக்க தொடங்கும் போது விழுவதில் தொடங்குகிறது நடைபயணம். அப்போது உடல் சிராய்ப்பு தவிர வேறு எந்தவிதமான பக்கவிளைவும் உண்டாகாது.

ஆனால் அதுவே முதுமை காலத்தில் வயது 65 ஐ கடக்கும் இரண்டாம் குழந்தை பருவத்தில் நடந்தால் அவை எலும்பை உடைத்து விடுகிறது. சில சமயங்களில் தலை, தோள்பட்டை, கைகள், முதுகெலும்பு முறிவு போன்ற பிரச்சனைகளில் ஒன்றை உண்டாக்கிவிடுகிறது.

உடலில் உண்டாகும் தடுமாற்றமும் வயோதிகமும் முதியவர்களுக்கே உரிய அச்சத்தை தோற்றுவிக்கிறது. இதனால் கீழே விழுந்துவிடுவோமோ என்ற பயமும் அவர்களுக்கு இயல்பாகவே ஏற்படுகிறது.

வயதானவர்கள் தங்களையும் மீறி கீழே விழுவதற்கு பல காரணங்கள் உள்ளன. எப்படி எச்சரிக்கையோடு இருந்து அவர்களை பாதுகாப்பது என்பது குறித்து இந்த தொகுப்பில் பார்க்கலாம்.

திடகாத்திரமான உடலை பெற்றிருந்தாலும் குறிப்பிட்ட வயதுக்கு மேல் உடல் உறுப்புகள் பலவீனமடைய தொடங்குகிறது. ஆரோக்கியமானவர்களுக்கே இந்த நிலைமை என்னும் போது இளவயதில் அதிகப்படியான உடல் உழைப்பு, தவறான பழக்கங்களை கொண்டவர்கள், போதிய சத்தை பெறாதவர்கள் அனைவருக்கும் இந்த பாதிப்பு அதிகமாகவே இருக்கும்.

இவை தவிர இயல்பாகவே அவர்களது பார்வைத்திறன் குறைகிறது. உடலை தாங்கி நிற்ககூடிய பேலன்ஸ் எலும்புகளுக்கு உண்டு. அந்த எலும்பு தேய்மானமும் உடலை தளர்வடைய செய்கிறது. வயது ஆக ஆக எலும்பு மற்றும் தசைகளின் ஆரோக்கியமானது பாதிக்க செய்யும்.

இதனால் உடலில் ஆற்றல் இல்லாமல் தள்ளாட்டத்தை உணரும் வயதானவர்கள் கீழே விழுவதை தவிர்க்கமுடிவதில்லை. உடலின் உறுப்புகள் ஒரு குறிப்பிட்ட வயதுவரை நம்முடைய கவனிப்பின்மையை பொறுத்துகொள்ளும்.

குறிப்பிட்ட வயதுக்கு மேல் உடலுக்கு போதுமான அளவு தேவைப்படும் சத்துகள் குறைய தொடங்கும். குறிப்பாக கால்சியம் சத்துகுறைபாடு இருப்பவர்கள் கீழே விழுவதற்கு அதிகப்படியான வாய்ப்பு உண்டு.

உடல் ஆற்றலுக்கு வேண்டிய சரிவிகித உணவு பற்றாக்குறையும் உடலை தளர்ச்சியடைய செய்யும். ஆண்கள் அதிகப்படியான உடல் உழைப்பால் வயதாகும் போது பலவீனமடைகிறார்கள் என்றால் பெண்கள் மாதவிடாய், மெனோபாஸ் காலங்களில் அதிகப்படியான இரத்த போக்கை சந்தித்து வயதாகும் போது பலவீனமடைகிறார்கள்.

இதனால் அன்றாட வேலைகளை கூட செய்துகொள்ள முடியாமல் தடுமாறுவதும் கீழே விழுவதும் சாதாரணமாக நிகழ்கிறது. இவை தவிர வசிக்கும் இடத்தையும் கூட ஒரு காரணமாக சொல்லலாம். முன்பு வீட்டின் தரையில் சாணம் மெழுகி இருப்பார்கள்.

ஒரு பிடிமானம் இருக்கும். தற்போது நவீன மாற்றங்களில் எல்லா வீடுகளுமே வழு வழுப்பான தரையோடு தான் மிளிர்கிறது. இவை நடக்கும் போது கால்களுக்கு பிடிமானத்தை தருவதில்லை. சிறுவர்களுக்கும் பெரியவர்களுக்கும் இதில் சிரமப் படும்போது முதியவர்கள் தள்ளாட்டத்தோடு இருக்கும் போது கால்கள் வழுக்கி கீழே விழுவது சாதாரணமாகிறது.

நடக்கும் இடத்தில் பொருள்கள் கீழே சிதறி கிடப்பதும் மாடிப்படிகளில் ஏறி இறங்கும் போதும் மிக முக்கியமாக வழ வழ கழிப்பறைகளிலும் விழுபவர்களின் எண்ணிக்கை மிக மிக அதிகம். இப்படி விழுவதால் ஒன்று ஒரே இடத்தில் முடங்கி விடுகிறார்கள் அல்லது சமயங்களில் இறப்பையும் சந்திக்கிறார்கள். இதில் வேறுவிதமான நோய்க்கு உட்பட்டிருந்தால் பாதிப்பு இன்னும் அதிகமாகிறது.

மருத்துவ காரணங்கள்

இளவயதில் எந்த வயதிலும் இந்த பிரச்சனையை சந்தித்திருக்கலாம். மூட்டு சம்பந்தமான பிரச்சனை, எலும்பு முறிவு பிரச்சனை, எலும்பு அடர்த்தி குறைந்து போதல் போன்றவர்கள், ஆஸ்டியோபோரோசிஸ் என்னும் பிரச்சனையை கொண்டிருப்பவர்கள், குறிப்பாக பெண்கள் நடக்கும் போதே தள்ளாடி கீழே விழ வாய்ப்புண்டு.

அல்சைமர் பாதிப்பு அதாவது மறதி நோய் கொண்டவர்கள், மன அழுத்தம், மன உளைச்சல் பிரச்சனை இருப்பவர்கள், நரம்பு சம்பந்தமான கோளாறுகளை கொண்டிருப்பவர்கள், பார்வை குறை பாடு, உயர் இரத்த அழுத்தம், இதய நோய் பிரச்சனை, ஸ்டீராய்டு மாத்திரைகள் உட்கொள்பவர்கள், பக்கவாதத்தால் பாதிக்கப்பட்டு மீண்டு வந்தவர்கள், மனதளவில் பலவீனமானவர்கள் அனை வருமே நடக்கும் போது தடுக்கி விழும் பாதிப்பை அதிகமாக கொண்டிருப்பார்கள்.

இவைகளை எப்படி தவிர்ப்பது ?

50 வயதுக்கு பிறகு எலும்புகளை உறுதிபடுத்தும் உணவை அடிக்கடி சேர்த்துவர வேண்டும். காலையில் எழும்போது படுக்கையை விட்டு உடனடியாக எழுந்து நடக்காமல் ஐந்துநிமிடங்கள் படுக்கையில் அமர்ந்து பிறகு நடக்க வேண்டும்.

குறிப்பாக உயர் இரத்த அழுத்தம் பிரச்சனை இருப்பவர்கள் உடனடியாக நடக்கும் போது தலைசுற்றல் மயக்கம் அடைந்து கீழே விழ வாய்ப்புண்டு. உயர் இரத்த அழுத்தம், நீரிழிவு, இதய நோய் கொண்டிருப்பவர்கள் அவ்வபோது மருத்துவரிடம் சென்று பரி சோதனை செய்துகொள்ள வேண்டும். முறையாக மாத்திரைகள் எடுத்துகொள்ள வேண்டும்.

வருடத்துக்கு ஒருமுறை உடல் பரிசோதனை செய்துவரவேண்டும். கண்ணாடி அணிந்திருப்பவர்கள் பரிசோதனை செய்து கண்ணாடி மாற்றி கொள்ள வேண்டும். ஸ்டீராய்டு மாத்திரைகளாக இருந்தாலும் மருத்துவரின் ஆலோசனையோடு எடுத்துகொள்வது நல்லது.

மேலும் உறங்கும் போது முழுமையான இருட்டை தவிருங்கள். படிக்கட்டுகள் கழிப்பறைகளை சொரசொரப்பாக இருக்கும்படி அமைப்பது மிகவும் நல்லது. வீட்டில் வழவழப்பான தரையை தவிர்க்க முடியாவிட்டால் நடக்கும் போது அழுத்தமான காலணிகளை அணிந்துகொள்வதும், கூச்சமின்றி ஒரு ஸ்டிக் வைத்துகொள்வதும் பாதுகாப்பானது.

கழிப்பறையில் டைல்ஸ் கண்டிப்பாக வேண்டாம். ஈரமில்லாமல் பார்த்துகொள்வது இன்னும் பாதுகாப்பானது. உங்கள் வீட்டில் இருக்கும் வயதானவர்களை பாதுகாக்க இந்த டிப்ஸ் கண்டிப்பாக உங்களுக்கு உதவிபுரியும்.

Related posts

Leave a Comment