September 28, 2022
உடல்நலம்

இந்த பிரச்சனை உள்ளவர்கள் கொய்யாப்பழம் சாப்பிடக் கூடாதா…! ?

நாம் உண்ணக்கூடிய ஆரோக்கியமான உணவுப்பழக்கத்தில் இடம்பெற வேண்டிய முக்கியமான பழங்களில் கொய்யாவும் ஒன்று. நாம் தினமும் ஒரு கொய்யாப்பழத்தைச் சாப்பிட்டு வந்தால் பல்வேறு ஆரோக்கிய நன்மைகளை நமக்கு தருகிறது.

கொய்யாவில் வைட்டமின் சி, வைட்டமின் பி, கால்சியம், மாக்னிஷியம், பாஸ்பரஸ், இரும்பு ஆகிய சத்துக்கள் நிறைந்துள்ளன. இவை குழந்தைகளுக்கு உடல் வளர்ச்சியைத் தருவதோடு எலும்புகளுக்குப் பலத்தையும் சேர்க்கும்.

இது தவிர, இந்த பழத்தில் ஃபோலேட் மற்றும் பீட்டா கரோட்டின் உள்ளது. எனினும், பல ஊட்டச்சத்துக்கள் உள்ள இந்த பழத்தை அளவுக்கு அதிகமாக உண்பது ஒரு சில நோயாளிகளுக்கு பக்க விளைவுகளை ஏற்படுத்தும் என்றும், பிரபல ஊட்டச்சத்து நிபுணர்கள் பரிந்துரைக்கின்றனர். யாரெல்லாம் கொய்யாவை சாப்பிடக் கூடாது என்பதை இந்த பதிவின் மூலம் நாம் தெரிந்து கொள்ளலாம்.

வயிறு தொடர்பான பிரச்சனை உள்ளவர்கள்:

கொய்யாவில் “வைட்டமின் சி” மற்றும் “ஃப்ருக்டோஸ்” அதிக அளவு உள்ளது. இந்த ஊட்டச்சத்துகளை அதிகமாக உட்கொள்ளும் போது, வயிறு உப்பசம் ஏற்படும். கொய்யா ஒரு நார்ச்சத்து நிறைந்த உணவாகும், நார்ச்சத்து நிறைந்த கொய்யா, மலச்சிக்கலுக்கு நிவாரணம் அளித்து, செரிமானத்தை மேம்படுத்துகிறது. ஆனால், அதிகப்படியான கொய்யா உண்பது உங்கள் செரிமானத்தை பாதிக்கும்.

சளி இருமல் பிரச்சனை:

சளி, இருமல் மற்றும் சளி உள்ளவர்கள் கொய்யாவை சாப்பிடக்கூடாது, ஏனெனில் இந்த பழம் குளிர்ச்சியானது. எனவே இதனை அதிகம் சாப்பிடும் போது, அது உங்கள் அசௌகரியத்தை அதிகரிக்கும். குறிப்பாக இரவில், இதனை சாப்பிடுவதைத் தவிர்க்க வேண்டும், இல்லையெனில் சளி போன்ற பக்க விளைவுகள் ஏற்பட வாய்ப்புள்ளது.

நீரிழிவு நோயாளிகள்:

கொய்யாப் பழம் குறைந்த கிளைசெமிக் குறியீடு கொண்டு இருப்பதால் நீரிழிவு நோயாளிகள் இந்த பழத்தை எடுத்துக் கொள்ளலாம். ஆனால், கொய்யாவை நீங்கள் தினசரி சாப்பிட்டாலோ அல்லது அதிகமாக சாப்பிட்டாலோ, உங்கள் ரத்த சர்க்கரை அளவை நீங்கள் கண்காணிக்க வேண்டும்.

உடலில் வீக்கம் உள்ளவர்கள்:

கொய்யாவில் ஏராளமான பிரக்டோஸ் மற்றும் வைட்டமின் சி உள்ளது, இவை இரண்டையும் அதிகமாக சாப்பிட்டால், அது உங்களுக்கு வயிற்றுப்போக்கை ஏற்படுத்தும். மேலும், உடலில் “வைட்டமின் சி” அதிகமாக உறிஞ்சப்படுவது கடினம். எனவே, கொய்யாவை அதிக அளவில் சாப்பிடுவது உடல் வீக்கத்தை அதிகரிக்கும். கொய்யா சாப்பிட்ட உடனே தூங்காமல் இருப்பது நல்லது. இல்லையெனில் வீக்கம் அதிகரிக்கும்.

இதய பாதிப்பு:

ஒரு சில நோயாளிகளுக்கு கொய்யா சாப்பிடுவது, பக்க விளைவுகளை ஏற்படுத்தும் என்று பிரபல ஊட்டச்சத்து நிபுணர்கள் எச்சரிக்கின்றனர். குறிப்பாக, இதய பாதிப்புகள் கொண்டவர்கள், கொய்யாவைத் தவிர்க்க வேண்டும்.

நாம் ஒரு நாளைக்கு எத்தனை கொய்யாப்பழம் சாப்பிடலாம் ?

கொய்யாவை குறைவான அளவிலே உண்ண வேண்டும். எனவே, ஒரு நாளைக்கு ஒன்று முதல் இரண்டு நடுத்தர அளவிலான கொய்யாவை சாப்பிடுவது ஆரோக்கியத்திற்கு நன்மை பயக்கும். மேலும் இதனை இரண்டு வேளைகளாக பிரித்து சாப்பிடுவது நல்லது. மேலும், பழம் சாப்பிடுவதை விட காய் சிறந்தது. இருப்பினும், ஊட்டசத்து நிபுணரை நாம் அணுகி மருத்துவ ஆலோசனை பெறுவது அவசியம்.

Related posts

Leave a Comment