November 27, 2022
உடல்நலம்

கோடை வெயிலுக்கு ஏற்ற உடலுக்கு குளிர்ச்சி தரும் முலாம்பழம்

முலாம்பழம் இனிப்பு சுவையும், நறுமணமும் கொண்டது. இது வைட்டமின்கள் ஏ, பி, சி மற்றும் கால்சியம், பாஸ்பரஸ் இரும்பு சத்துக்கள் கொண்டது. இதன் பழங்கள் இனிப்பாக இருக்கும். முதிர்ச்சியடையாத முலாம்பழம் சமைப்பதற்கும், ஊறுகாய் தயாரிப்பதற்கும் பயன்படுகிறது.

இதை வட மாநிலத்தவர் அதிகம் பயன்படுத்துவர். ஆனால் தமிழகத்தில் அதிகம் பயன்படுத்தப்படாத பழம் முலாம்பழம். வெயில் கால உடல் சார்ந்த பிரச்சனைகளை தணிக்கும் தன்மை இந்த முலாம்பழத்திற்கு உள்ளது.

முலாம்பழம் உடலை குளிர்ச்சிப்படுத்தும் மருந்தாக பயன்படுகிறது. குறிப்பாக சிறுநீரக கற்களை கரைக்கும் தன்மை கொண்டது. இது கோடை காலத்தில் அதிகளவில் கிடைக்கும்.

முலாம்பழத்தின் சிறப்பு குணங்கள்

இது நோய்களை தடுக்க கூடியது மட்டுமின்றி உடலுக்கு புத்துணர்வை அளிக்க வல்லது. வெயில் காலத்தில் ஏற்படும் சோர்வை போக்குகிறது. சிறுநீர் எரிச்சலை தடுக்கும், சத்தூட்டமான உணவாகிறது.

முலாம்பழத்தின் சதை மற்றும் விதையுடன் சிறிதளவு சீரகப்பொடி சேர்த்து கொதிக்க வைத்து, வடிகட்டி குடிப்பதால் உடலுக்கு குளிர்ச்சி ஏற்படுவதுடன் உற்சாகத்தையும் கொடுக்கிறது. சிறுநீர் பெருக்கியாக விளங்கும் இது சிறுநீர் தாரையில் ஏற்படும் எரிச்சலை தடுக்கிறது.

கர்ப்பிணி பெண்கள் முலாம்பழத்தை எடுத்துக்கொண்டால் குழந்தையின் ஆரோக்கியம் மேம்படும். குழந்தையின் குதுகெலும்பு மற்றும் மூளை வளர்ச்சி போன்றவை நன்றாக இருக்கும். இது குழந்தைகள் மற்றும் கர்ப்பிணிகளுக்கு பாதுகாப்பானது.

காய்ச்சிய பாலுடன், விதை நீக்கிய முலாம்பழம், பனங்கற்கண்டு மற்றும் சிறிதளவு குங்குமப்பூ சேர்க்கவும். இந்த மில்க் ஷேக்கை காலை உணவின் போது எடுக்கலாம். இதை குழந்தைகள் விரும்பி சாப்பிடுவர்.

முலாம்பழத்தினை உண்டுவர மூல நோய் குணமாகும். மலசிக்கல் நீங்கும், நீர்க்கடுப்பு நீங்கும், அஜீரணத்தை அகற்றி பசி ருசியை ஏற்படுத்தும். இதில் வைட்டமின் ஏ, பி, சி மற்றும் தாது பொருட்கள் இருப்பதால் நோய் எதிர்ப்பு சக்தியை உண்டாக்கும்.

முலாம்பழம் பித்தத்தை மொத்தமாக அகற்றும். கல்லீரல் கோளாறுகளை போக்கும் தன்மை இதற்கு உண்டு. மேலும் சரும நோய்க்கு எளிய இயற்கை மருந்து. இப்பழத்தின் சதையுடன் தேன் கலந்து உண்டு வர, வாய்ப்புண், தொண்டைப்புண் குணமாகும்.

முலாம்பழத்துடன் 1/4 ஸ்பூன் சீராக பொடி, சிறிதளவு பனங்கற்கண்டு மற்றும் 2 சிட்டிகை சுக்குப் பொடி இவற்றை கலந்து காலை, மாலை சாப்பிட்டுவர வயிற்றுவலி மற்றும் உஷ்ணத்தால் ஏற்படும் வயிற்றுப்போக்கு சரியாகும்.

முலாம்பழத்தின் சதையை சர்பத் செய்து குடித்து வர உடலுக்கு குளிர்ச்சி ஏற்படும். உடலுக்கு அதிக வலுவை தரும். கண்பார்வை மேம்படும். வயிற்றில் உள்ள பூச்சிகளை வெளியேற்றும்.

இந்த முலாம்பழத்தை சாப்பிட்டு வந்தால், உள் உறுப்புகளின் உஷ்ணத்தை குறைக்கிறது. வெயிலால் ஏற்படும் நோய்களை குணமாக்கும். கோடை நோய்கள் வராமல் நம்மை பாதுகாக்கும். இது கோடை காலத்துக்கு ஏற்ற உணவாக விளங்குகிறது.

Related posts

Leave a Comment